Габдулла Кариев театры репертуары

  • "Супер кияү" ("Алты кызга бер кияү")

    "Супер кияү" ("Алты кызга бер кияү")

    Вакыйга бухгалтериядә бара. Андагы эш шактый бертөсле, бухгалтерия гомумән, күңелле вакыйгаларга саран җир. Әмма, монда, алты хатын-кыз эшләгән бухгалтериядә эшләр икенчерәк. Чөнки алты хатын-кыз янында бер бик җор холыклы, мәзәкчән, шаян телле, җыр сөюче, киң күңелле бер ир-ат та эшли. Халыкта шадра йөрәк яндыра дигән гыйбарә бар. Рәхмәтулла Хөрмәтуллович та, күрер күзгә бик алай чибәрләрдән булмаса да, кешеләрне үзенә тартып тора. Сөйкемле сөяге бар үзенең.

  • "Убыр-шоу"

    "Убыр-шоу" (әкият)

    Кышкы урман. Барлык җәнлекләр, хайваннар, кош-кортлар Яңа ел килеп җитүен сизенәләр, куаналар, Яңа елны каршы алырга әзерләнәләр. Ләкин бу Яңа ел шартлыкларына, куанычларына Убырлы карчыкның бик нык ачуы килә. Ул урманда яшәүче кош-кортларны, җәнлекләрне үзенең салкын җилләре, кар-бураннары белән җәфалый. Убырлы карчык шатланган җәнлекләрне, кош-кортларны яратмый, чөнки ул ялгыз, аның дуслары  юк. Шуңа күрә, ул җәнлекләрне шатлыкларыннан туктатырга тели.

    Ә көннәрдән бер көнне ул барлык җәнлекләр, кош-кортларны кар белән каплап китә. Шул рәвешле иске ел хуҗасы Маймыл да кар астында күмелеп кала.  Ә ул киләсе Яңа ел хуҗасы Әтәчне эзләп ерак илләрдән юлга чыккан була. Маймыл кар астыннан чыгып, башкаларны да кардан арындыра, ә аннары алардан Әтәчне табарга ярдәм итүләре сорый. Чөнки ул Яңа ел вазыйфаларын Әтәчкә тапшырырга тиеш.

  • "Улыбыз өйләнә, без аерылышабыз"

    «Улыбыз өйләнә, без аерылышабыз»

    18 яшьлек Гөлүс белән Нәзнинә бер-берләрен яраталар һәм өйләнешәбез диләр. Вакыйгалар тимер юл янында урнашкан фатирда бара.

  • "Ширбәт ае"

    "Ширбәт ае"

    Заһит белән Сара туйдан соң ширбәт аена диңгезгә китәләр. Әмма аларның рәхәт көннәре озакка сузылмый. Көннәрдән бер көнне аларның отельдәге бүлмәләренә тәрәзәдән мөгез килеп төшә. Заһит бу билгегә игътибар итмичә кала алмый. Шул мизгелдә ул үзенең әлеге мөгезләрнең иясе икәнлеген аңлый. Димәк, Сара аңа хыянәт иткән?  

  • “Айрыз батыр”

    “Айрыз батыр”

    Урта гасырда бөек Казан-хан хакимлек иткән төрки угыз кабиләләре ханлыгы тынычлык сөюче ил буларак ныгый һәм чәчәк ата. Аларның ирекле тормыш итүләре караңгылык патшасы Тагавар һәм аның сихерче хатыны Карабикәгә тынгылык бирми. Тагавар ирекле халыкны Җир йөзеннән себереп түгәргә һәм мәңгелек караңгылыкка күмәргә хыяллана.

  • “Ак Барс маҗаралары”

    “Ак Барс маҗаралары”

    "Ак барс маҗаралары" әкияте - дуслык, рух ныклыгы һәм көтелмәгән җиңүләр, барс һәм куркак куян турында. Куркак Куянны  мәктәптә кыерсыталар. Ә аның көчен күргәч, барс куянны бокс тренировкасына алып бара,  аны  боксчы ясарга уйлый. Ак барска Янут, тренер ярдәмгә киләләр.  Бик күп тырышканнан соң, Куян куркактан чын боксчыга әверелә.

    Спектакль аша балалар спорт белән шөгыльләнергә, максатларга ирешергә, дусларга таяныч була белергә өйрәнә. 

  • “Ничек миллионер булырга?”

    “Ничек миллионер булырга?”

    Вахит белән Руфинә бер-берсенә гашыйк парлар. Алар үзләренең булачак туйлары турында сөйләшәләр. Руфинә туйны бай әтисе хисабына үткәрергә уйлый, туйдан соң әтисе бүләк иткән өч бүлмәле фатирда яшәячәкләрен  әйтә.  Кечкенәдән ятим калып интернатта үскән Вахит аның белән килешми, туйдан соң “хрущевка”дагы үз бүлмәсендә яшәүләрен тели. Ул бар нәрсәгә үз тырышлыгы белән ирешергә тели.  Гашыйклар бер-берсен аңлаша алмыйча, уртак фикергә килә алмыйча аерылышалар. 

  • “Светофорда кунакта”

    “Светофорда кунакта”

    Урман аланы. Шул урманда ике бертуган Куян балалары. Шаян белән Наян яшиләр. Алар шундый шук, сикерәләр, уйныйлар, чабалар, шул вакытта урманда үскән чебен гөмбәсен бәрдереп имгәтәләр. Аларның уйнаганнарын куаклар арасыннан урманда яшәүче Убырлы карчык карап торган була. Үзенең алардан ничек туйганлыгын һәм үзе кадерләп карап үстергән чебен гөмбәсен имгәткәннәре өчен ул куян балаларыннан үч алмакчы була һәм ул хәйлә уйлап таба: аларны алдап шәһәргә җибәреп, машинага таптатырга дигән фикергә килә, чөнки куян балалары юл йөрү кагыйдәләрен белмиләр.

  • “Әйдә барыйк, кызлар карыйк”

    “Әйдә барыйк, кызлар карыйк”

    Кызлар игътибарыннан мәхрүм дүрт авыл егетенең зирәклек һәм тапкырлык белән үз бәхетләрен үзләре оештыруы хакындагы әлләни катлаулы булмаган тарих бу. Сюжет үтә гади һәм спектакль күбрәк театральләштерелгән концертны хәтерләтә. 

    Сәхнәдә мәхәббәт бәясе, дуслыкның кыйммәте, кайчак, язмыштан ярдәм көтеп утырасы урынга, дилбегәне үз кулыңа алырга кирәклеге турында сөйләнелә. 

  • “Әйт әле, күбәләк”

    “Әйт әле, күбәләк”

    Пьесада тасвирланган вакыйгалар ике чорны – Габдулла Тукайның кечкенә чагы – Апуш чорын һәм инде җитлеккән шагыйрь – Тукай чорын үз эченә ала. Вакыйга Тукайның туган авылы Кушлавычта, чишмә буенда бара. Пьесаның геройлары бәләкәй Апуш һәм Тукай һәм аның шигырьләрендәге персонажлар: Күбәләк, Сандугач, Карлыгач, Шүрәле, Каракош, авыл эте Акбай һ.б. күбәләкләр, карлыгачлар.

Битләр